Молитва за Отчизну
О, премилосердный Господи, Боже щедрот, и Отче всякаго утешения! Не отврати лице Твое от народа Твоего, и не посрами чаяния нашего: уповающе на Тя, молимся Тебе, и молящеся на щедроты Твоя уповаем. Сохрани под кровом Твоея благости Отчизну нашу, посети ю благостию Твоею, Господи: явися всем народам, ю населяющим, богатыми щедротами Твоими: благорастворены и полезны воздухи всем даруй, дожди мирны земли ко плодоносию даруй: благослови венец лета благости Твоея: утоли раздоры церквей, угаси шатания, и еретическая возстания скоро разори силою Святаго Твоего Духа: всех нас приими в Царство Твое, сыны света и сыны дне показавый, Твой мир и Твою любовь даруй нам, Господи Боже наш, вся бо воздал еси нам. Ты бо един веси, еже требуем, и прежде прошения подаеши, и дарования утверждаеши, и всяко даяние благо, и всяк дар совершен свыше есть, сходяй от Тебе, Отца светов: Тебе слава и держава со Единородным Твоим Сыном, и Всесвятым и Благим и Животворящим Твоим Духом, ныне и присно, и во веки веков. Аминь.
Молитва за народ православный
Господи Боже наш, великий и многомилостивый! Во умилении сердец наших смиренно молимся Тебе. Сохрани под кровом Твоея благости от всякаго злаго обстояния нас, христиан православных. Огради нас на всех путях наших святыми Твоими Ангелы, да ничтоже успеет враг на нас, и сын беззакония не приложит озлобити нас. Исполни нас долготою дней и крепостию сил, да совершим вся во славу Твою и во благо народа своего. Да всеблагому Твоему промышлению о нас радующеся, на всяк день и час благословим и прославим Всесвятое имя Твое: Отца и Сына и Святаго Духа. Аминь.
Молитва за Россию и воинство ее
Господи Боже наш, послушавый Моисеа, простерша к Тебе руце, и люди Израилевы укрепивый на Амалика, ополчивый Иисуса Навина на брань, и повелевый солнцу стати: Ты и ныне, Владыко Господи, услыши нас, молящихся Тебе: укрепи силою Твоею Родину нашу, умножи славу ея победами над супостаты: утверди всесильною десницею Твоею державу нашу, сохрани воинство ея, отыми от нас всяк глад и пагубу, и избави ны от огня и меча и нападения враг, и от всякаго востания противнаго: Посли, Господи, невидимо десницу Твою, раби Твоя заступающую во всех: яко Твоя держава, царство и сила, от Тебе помощь все приемлем, на Тя уповаем, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.
Молитва о прекращении раздоров, крамол и нестроений внутренних
Господи Иисусе Христе, Боже наш! Приими молитвы и рук наших воздеяния о оставлении всех грехов и беззаконий наших, имиже раздражихом Твое человеколюбие и прогневахом Твою благость: и отврати от нас весь гнев Свой, праведно движимый на ны, и утоли вся крамолы и нестроение, и раздоры, ныне сущия, и кровопролития, и междоусобную брань, и подаждь мир и тишину, любовь же и утверждение, и скорое примирение людем Твоим, ихже честною Твоею искупил еси Кровию, славы ради имени Твоего, утверждения же и укрепления Церкве Твоея Святыя, яко благословен еси во веки веков. Аминь.
Покаянная молитва, которую читали в церквах в России во дни смуты
Господи Боже, Вседержителю, призри на нас, грешных и недостойных чад Твоих, согрешивших пред Тобою, прогневавших благость Твою, навлекших гнев Твой праведный на ны, падших во глубину греховную. Ты зриши, Господи, немощь нашу и скорбь душевную, веси растление умов и сердец наших, оскудение веры, отступление от заповедей Твоих, умножение нестроений семейных, разъединения и раздоры церковныя, Ты зриши печали и скорби наша, от болезней, гладов, потопления, западения и междоусобныя брани происходящыя. Но, Премилостивый и Человеколюбивый Господи, вразуми, настави и помилуй нас, недостойных. Исправи жизнь нашу греховную, утоли раздоры и нестроения, собери расточенныя, соедини разсеянныя, подаждь мир стране нашей и благоденствие, избави ю от тяжких бед и несчастий. Всесвятый Владыко, просвети разум наш светом учения Евангельскаго, возгрей сердца наша теплотою благодати Твоея и направи я к деланию заповедей Твоих, да прославится в нас Всесвятое и Преславное имя Твое, Отца и Сына и Святаго Духа, ныне и во веки веков. Аминь.
----------------------------------------------------------------------
Молитвы святым воинам
Св. мученику Иоанну Воину
О, мучениче Христов Иоанне Воине! Храбрый во бранех, и скорый заступник православных христиан в бедах и напастях их, по данной благодати от Бога! Буди нам поборник крепок на вся видимыя и невидимыя враги наша. Воинству нашему на враги победу даруй, да смирятся противящиися нам и вразумятся, и Бога истиннаго познают и святую Его Церковь Православную. Мы же, грешнии, да сподобимся прославляти Господа Спаса нашего во Царствии Его вкупе с тобою во веки. Аминь.
Св. Георгию Победоносцу
О всехвальный, святый великомучениче и чудотворче Георгие! Умоли Человеколюбца Бога, скорый помощниче всех призывающих тя, да не осудит нас, грешных, по беззаконием нашым, но да сотворит с нами по велицей Своей милости и подаст православному Отечеству нашему и всему боголюбивому воинству на супостаты одоление; да укрепит государство Российское непременяемым миром и благословением; изряднее же да оградит нас святых Ангел Своих ополчением, во еже избавитися нам, по исходе нашем из жития сего, от козней лукаваго и тяжких воздушных мытарств его, и неосужденным предстати престолу Господа славы. Аминь.
Св. благоверным князьям Российским, страстотерпцам Борису и Глебу
О двоице священная, святии страстотерпцы Борисе и Глебе, от юности Христу верою, чистотою и любовию послужившии, и кровьми вашими яко багряницею украсившиися, и ныне со Христом царствующии! Будите нам теплии заступницы, оградите всех нас от всякий скорби, озлоблений и внезапныя смерти. Молим вас, христолюбивии страстотерпцы, споспешествуйте державе Российстей к победе на враги, якоже некогда благоверному князю Александру Невскому на Ледовом побоище Чудском и на брегах Невы. Да несут Российстии воини страх врагам, свободу угнетенным народам и мир на земли, да в тихом житии поживут людие и во всяком благочестии славят Бога Отца и Сына и Святаго Духа. Аминь.
Св. благоверному князю Александру Невскому
Скорый помощниче всех усердно к тебе прибегающих и теплый наш пред Господом предстателю, святый благоверный великий княже Александре! Призри милостивно на ны недостойныя, из глубины сердца к тебе взывающыя. Ты в житии твоем ревнитель и защитник православный веры был еси: и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси: и нас твоею помощию пребывати коегождо, в неже призван есть, настави. Ты, победив полки супостатов, от пределов Российских отгнал еси: и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие, и ныне праведно венцем нетленным увенчанный на небесех царствуеши: исходатайствуй и нам, смиренно молим тя, житие тихое и безмятежное, и к вечному Царствию шествие неуклонное. Предстоя же со всеми святыми престолу Божию, молися о всех православных христианех, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим Бога во Святей Троице, Отца и Сына и Святаго Духа. Аминь.
Тропарь св. благоверному великому князю Димитрию Донскому
Велика обрете в бедах тя поборника земля Русская, языки побеждающа. Якоже на Доне Мамаеву низложил еси гордыню, на подвиг сей прияв благословение преподобнаго Сергия, тако, княже Димитрия, Христу Богу молися даровати нам велию милость.
----------------------------------------------------------------------
Молитвы перед битвой
Молитва первая
Боже крепкий, в руце Своей содержай судьбы человеков! Не помяни грехов моих, и укрепи мя свыше силою Твоею на супротивныя нам. Даруй ми бодр ум и сердце безтрепетно, да страха их не убоюся ниже смущуся, но в сени священных хоругвей воинства нашего пребуду верен воинской клятве моей до конца. Во имя Твое, Господи, гряду, и да будет воля Твоя.
Пресвятая Богородице, спаси нас!
Святый Архистратиже Михаиле, споборствуй нам!
Святый Ангеле хранителю, не отступи от мене!
Вси святии, молите Бога о нас!
Молитва вторая св. мученика Феодора Стратилата
Господи Боже всесильный, всех уповающих на милость Твою не оставляяй, но защищаяй их! Буди мне милостив и соблюди мя от прелести вражия Твоим защищением, да не паду пред сопротивниками моими, и да не порадуется враг мой о мне. Предстани мне, Спасителю мой, в подвиге сем за имя Твое святое. Ты мя укрепи и утверди и подаждь силу стати мужественно за Тя до крове и положити душу мою по любви к Тебе, якоже и Ты, возлюбив нас, положил еси на Кресте душу Свою за нас. Аминь.
Молитва третья св. Архистратигу Божию Архангелу Михаилу
Святый и великий Архистратиже Божий Михаиле, ниспровергий с небесе диавола и воинство его! К тебе с верою прибегаем и тебе с любовию молимся, буди щит несокрушим и забрало твердо Святей Церкви и православному Отечествию нашему, ограждая их молниеносным мечем твоим от всех враг видимых и невидимых. Буди Ангел хранитель, наставник премудр и споспешник предводителем нашим. Буди вождь и соратай непобедимь христолюбивому воинству нашему, венчая его славою и победами над супостаты, да познают вси противляющиися нам, яко с нами Бог и святии Ангелы Его. Аминь.
Молитва четвертая Небесным Силам
Тропарь, глас 4-й
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы; сохраняюще нас, припадающих прилежно и вопиющих: от бед избавите нас, яко чиноначальницы вышних Сил.
Кондак, глас 2-й
Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко Безплотных Архистратизи.
----------------------------------------------------------------------
Молитвы во время битвы
Из псалма 67
Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут грешницы от лица Божия; а праведницы да возвеселятся. Господь Бог благословен, поспешит нам Бог спасений наших. Дивен Бог во святых Своих, Бог Израилев: Той даст силу и державу людем Своим. Аминь.
Псалом 90
Живый в помощи Вышняго, в крове Бога Небеснаго водворится, речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи и от словесе мятежна: плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится: обаче очима твоима смотриши и воздаяние грешников узриши. Яко Ты, Господи, упование мое, Вышняго положил еси прибежище твое. Не прииидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою: на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его и прославлю его: долготою дний исполню его и явлю ему спасение Мое.
----------------------------------------------------------------------
Молитвы после битвы
Молитва благодарственная
Благодарю Тя, Господи Боже мой, яко приял еси моление недостойнаго раба Твоего и посреди толиких бед сохранил мя еси, в мужестве творяща дело звания моего. Величающе безмерную Твою благость, паки смиренно молю Тя: да якоже ныне тако и во предняя явиши мя верна защитника Отечества нашего, от всякаго злаго обстояния избавляюще. Слава Тебе, Богу, Благодателю нашему, во веки веков!
Песнь хвалебная св. Амвросия, епископа Медиоланского, поемая в час благодарственных Господу Богу молебнов
Тебе Бога хвалим, Тебе Господа исповедуем, Тебе Предвечного Отца вся земля величает. Тебе вси Ангели, Тебе небеса и вся Силы, Тебе Херувими и Серафими непрестанными гласы взывают: Свят, Свят, Свят, Господь Бог Саваоф! Полны суть небеса и земля величества славы Твоея. Тебе преславный апостольский лик, Тебе пророческое хвалебное число, Тебе хвалит пресветлое мученическое воинство, Тебе по всей вселенней исповедует Святая Церковь, Отца непостижимаго величества, покланяемаго Твоего истиннаго и Единороднаго Сына и Святаго Утешителя Духа. Ты, Царю славы, Христе, Ты Отца присносущный Сын еси: Ты, ко избавлению приемля человека, не возгнушался еси Девическаго чрева. Ты, одолев смерти жало, отверзл еси верующим Царство Небесное. Ты одесную Бога седиши во славе Отчей, Судия приити веришися. Тебе убо просим: помози рабом Твоим, ихже честною Кровию искупил еси. Сподоби со святыми Твоими в вечней славе Твоей царствовати. Спаси люди Твоя, Господи, и благослови достояние Твое, исправи я и вознеси их во веки, во вся дни благословим Тебе и восхвалим имя Твое во век и в век века. Сподоби, Господи, в день сей без греха сохранитися нам. Помилуй нас, Господи, помилуй нас: буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки. Аминь.
Молитвы воина в болезни, в ранах, и во всякой скорби сущаго
Согреших, Господи, и беззаконновах, сего ради и гнев Твой праведный постиже мя, и сень смертная обыде мя, и ко адовым вратам приближихся: но к Тебе, Богу моему милосердному и Владыце живота и смерти, в болезни и скорби моей умильно вопию: пощади, пощади мя и не погуби до конца - Твое есмь создание, молютися смиренно, услыши мя, Господи, и помилуй. Аминь. Животом и смертию владычествующий Господи, не затвори в смерти душу мою, но престани от гнева, и остави ярость: зане исчезают, яко дым дни мои, кости моя, яко сушило сосхошася, и изсше крепость моя, и погибаю до конца, грех ради моих. Но в покаянии и со слезами молютися: услыши, Боже, и милостив буди ми, рабу Твоему. Аминь.
Молитва над болящими
Господи Боже наш, призри с высоты святыя Твоея на молитву нас, грешных и недостойных рабов Твоих, беззаконьми нашими Твою благость прогневавших и благоутробие Твое раздраживших, и не вниди в суд с рабы Твоими: аще бо беззакония назриши Господи, Господи, кто постоит? Но утоли болезни и огневицу и скорбь рабов Твоих, и пощади нас, нищих и убогих, и не затвори в смерти души наша, в покаянии сокрушенным сердцем и со слезами к Тебе, милосердному, благоуветливому, и благопременительному Богу нашему, припадающих.
Молитва болящего воина ко Господу Спасителю
Врачу душ и телес! Во умилении сердца моего к Тебе припадаю, просяще исцеления. Вем, Господи, яко достойная приемлю по делом моим, зане преступих повеления Твоя. Обаче рекл еси: яко хотением не хощу смерти грешника, но еже обратитися и живу быти ему. Сего ради молю непамятозлобное человеколюбие Твое: не помяни грехов и беззаконий моих, о нихже сокрушаюся всем сердцем моим, и милостивно сотвори мя причастника Пречистаго Тела и Крове Твоея, да тако приуготован о надежде пребуду жизни вечныя. В сей же привременней жизни подаждь ми, Господи, исцеление от обдержащия мя немощи, уврачуй раны моя, укроти болезнь, угаси огневицу и всяку страсть и немощь, во мне таящуюся, и скоро воздвигни от одра болезненнаго. Утеши скорбящия о мне родители и ближняя моя, пекущимся о мне воздаждь сторицею, купно со мною болящим зде посли ослабу и исцеление. Всем нам Врач и Утешитель буди, да в терпении стяжавше души наша, вящшии обрящемся к служению Отечеству на пользу и Тебе, Спасителю нашему, во славу. Аминь.
Молитва св. мученика Евтропия воина, в ранах и страданиях
Боже Вседержителю, благий и милостивый, Помощниче во узах и Податель мужественнаго терпения в муках! Даждь нам терпение в ранах сих и прииди на помощь к нам, якоже к рабу Твоему мученику Феодору пришел еси и помогл ему, и всесильною Твоею помощью яви всем, яко мы воистину Тя единаго имамы Господа Спаса и Тебе Единому покланяемся, славяще Тя со Отцем и Святым Духом во веки. Аминь.
Молитва заключенного воина
Долготерпеливе и многомилостиве Господи! Припадаю к Тебе, аз сый узник, моляся тепле: якоже сильный Сампсон позна свое безсилие, егда бе под стражею и обратися к Тебе, всесильному Богу, окованный путы железными; якоже нечестивый Манассия в пленении и темнице взыска Тебе, истиннаго Бога; якоже пленнии иудее паче на земли чуждей уразумеша Тебе, Бога отец своих; якоже блудный сын воспомяну отца своего, егда, отшед на страну далече, нача изгибати гладом: тако и аз отныне токмо познаю Тебе и прилежнее молю. Отчужден есмь аз ныне общения с человек: но Ты, еси взыскуяй отчужденных. Несть со мною зде ни отец, ни мать, ни брат, ни един от другов моих, да помогут ми, не услышит отсюда моего вопля никтоже от них: но Ты близ еси всем скорбящим и призывающим Тя во истине. О милосердый Боже! Аще аз и паче числа песка морскаго согреших пред Тобою, аще и несмь достоин воззрети на высоту небесную от множества грехов моих: но Ты, непамятозлобив сый, приими мя кающагося. Тебе единому согрешит, но и Тебе единому каюся, Всемилостиве Господи! прежде даже до конца не погибну, спаси мя.
Моление о упокоении православных воинов, за веру и Отечество на поле брани убиенных
Непобедимый, непостижимый и крепкий во бранех Господи Боже наш! Ты, по неисповедимым судьбам Своим, овому посылаеши Ангела смерти под кровом его, овому на селе, овому на мори, овомуже на поле брани от оружий бранных, изрыгающих страшныя и смертоносныя силы, разрушающия телеса, расторгающия члены и сокрушающия кости ратующих; веруем, яко по Твоему, Господи, премудрому смотрению, такову приемлют смерть защитники веры и отечества. Молим Тя, Преблагий Господи, помяни во Царствии Твоем православных воинов на брани убиенных и приими их в небесный чертог Твой, яко мучеников изъязвленных, обагренных своею кровию, яко пострадавших за Святую Церковь Твою и за отечество, еже благословил еси, яко достояние Свое. Молим Тя, приими убо отшедших к Тебе воинов в сонмы Воев Небесных Сил, приими их милостию Твоею, яко павших во брани за независимость земли Русския от ига неверных, яко защищавших от врагов веру православную, защищавших отечество в тяжкие годины от иноплеменных полчищ; помяни, Господи, и всех, добрым подвигом подвизавшихся за древнехранимое Апостольское Православие, за освященную и в язык свят избранную Тобою землю Русскую, в нюже враги Креста и Православия приношаху и огнь, и меч. Приими с миром души раб Твоих (имена), воинствовавших за благоденствие наше, за мир и покой наш, и подаждь им вечное упокоение, яко спасавшим грады и веси и ограждавшим собою отечество, и помилуй павших на брани православных воинов Твоим милосердием, прости им вся согрешения, в житии сем содеянная словом, делом, ведением и неведением. Призри благосердием Твоим, о Премилосердый Господи, на раны их, мучения, стенания и страдания, и вмени им вся сия в подвиг добрый и Тебе благоугодный; приими их милостию Твоею, зане лютыя скорби и тяготу зде прияша, в нуждех, тесноте, в трудех и бдениих быша, глад и жажду, изнурение и изнеможение претерпеша, вменяеми быша яко овцы заколения. Молим Тя, Господи, да будут раны их врачевством и елеем, возлиянным на греховныя язвы их. Призри с небесе, Боже, и виждь слезы сирых, лишившихся отцев своих, и приими умиленныя о них мольбы сынов и дщерей их; услыши молитвенныя воздыхания отцев и матерей, лишившихся чад своих; услыши, благоутробне Господи, неутешных вдовиц, лишившихся супругов своих; братии и сестер, плачущих о своих присных, - и помяни мужей, убиенных в крепости сил и во цвете лет, старцев, в силе духа и мужества; воззри на сердечныя скорби наша, виждь сетование наше и умилосердися, Преблагий, к молящимся Тебе, Господи! Ты отъял еси от нас присных наших, но не лиши нас Твоея милости: услыши молитву нашу и приими милостивно отшедших к Тебе приснопоминаемых нами рабов Твоих (имена); воззови их в чертог Твой, яко доблих воинов, положивших живот свой за веру и отечество на полях сражений; приими их в сонмы избранных Твоих, яко послуживших Тебе верою и правдою, и упокой их во Царствии Твоем, яко мучеников, отшедших к Тебе израненными, изъязвленными и в страшных мучениях предававшими дух свой; всели во святый Твой град всех приснопоминаемых нами рабов Твоих (имена), яко воинов доблих, мужественно подвизавшихся в страшных приснопамятных нам бранех; облецы их тамо в виссон светел и чист, яко зде убеливших ризы своя в крови своей, и венцев мученических сподоби; сотвори их купно участниками в торжестве и славе победителей, ратоборствовавших под знаменем Креста Твоего с миром, плотию и диаволом; водвори их в сонме славных страстотерпцев, добропобедных мучеников, праведных и всех святых Твоих. Аминь.
----------------------------------------------------------------------
Молитвы на воинскую потребу
Молитва перед отправлением в плавание
Владыко Господи Иисусе Христе, Боже наш, вместе со святыми Своими учениками и апостолами плававший, бурный ветер утишивший и повелением Своим волны на море успокоивший! Сам, Господи, и нам сопутствуй в плавании, всякий бурный ветер утиши и будь Помощником и Заступником, ибо Ты Бог Благий и любящий человеков и Тебе славословие приносим, Отцу и Сыну и Святому Духу, ныне и присно и во веки веков. Аминь.
Молитвы на море плавающих
Тропари: глас 2-й
Тебе Спасе, ныне прибегающих, и от Твоея всесильныя десницы помощи и благословения, яко от Творца и Владыки ищущих, не презри: но якоже иногда на море словом тишину апостолом Своим подал еси, и ныне тихое и безмятежное во благополучии, со здравием и победою плавание тем даруй молитвами Богородицы, Едине Человеколюбче.
Глас 5-й
Слава: Всю надежду и упование свое на Тя, Христе, возложшим, Помощник и Защититель буди, и победу даруя им на враги, путешествие их благослови, и благополучно сотвори, да вси славим Тя, единаго Заступника и Благодетеля нашего.
И ныне: Под Твой покров прибегаем, Богородице Дево, молитв наших не презри в скорбех: но от бед избави ны, едина Чистая и Благословенная.
Псалом 68 (читаемый от потопления)
Спаси, мя, Боже, яко внидоша воды до души моея. Углебох в тимении глубины, и несть достояния. Приидох во глубины морския, и буря потопи мя. Утрудихся зовый, измолче гортань мой, исчезосте очи мои, от еже уповати ми на Бога моего. Умножишася паче влас главы моея ненавидящии мя туне, укрепишася врази мои, изгонящии мя неправедно: яже не восхищах, тогда воздаях. Боже, Ты уведел еси безумие мое, и прегрешения моя от Тебе не утаишася. Да не постыдятся о мне терпящии Тебе, Господи, Господи сил, ниже да посрамятся о мне ищущии Тебе, Боже Израилев. Яко Тебе ради претерпех поношение, покры срамота лице мое. Чуждь бых братии моей, и странен сыновом матере моея. Яко ревность дому Твоего снеде мя, и поношения поносящих Ти нападоша на мя. И покрых постом душу мою и бысть в поношение мне и положих одеяние мое вретище, и бых им в притчу. О мне глумляхуся седящии во вратех, и о мне пояху пиющии вино. Аз же молитвою моею к Тебе Боже, время благоволения, Боже, во множестве милости Твоея услыши мя, во истине спасения Твоего. Спаси мя от брения, да не углебну, да избавлюся от ненавидящих мя и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя. Вонми души моей, и избави ю, враг моих ради избави мя. Ты бо веси поношение мое и студ мой, и срамоту мою: пред Тобою вси оскорбляющии мя. Поношение чаяше душа моя, и страсть и ждах соскорбящаго, и не бе, и утешающих, и не обретох. И даша в снедь мою желчь, и в жажду мою напоиша мя оцта. Да будет трапеза их пред ними в сеть, и в воздаяние, и в соблазн. Да помрачатся очи их, еже не видети, и хребет их выну сляцы. Пролей на ня гнев Твой, и ярость гнева Твоего да постигнет их. Да будет двор их пуст, и в жилищах их да не будет живый. Зане егоже Ты поразил еси, тии погнаша, и к болезни язв моих приложиша. Приложи беззаконие к беззаконию их, и да не внидут в правду Твою. Да потребятся от книги живых и с праведными да не напишутся. Нищ и боляй есмь аз: спасение Твое, Боже, да приимет мя. Восхвалю имя Бога моего с песнию, возвеличу Его во хвалении: и угодно будет Богу паче тельца юна, роги износяща и пазнокти. Да узрят нищии и возвеселятся: взыщите Бога, и жива будет душа ваша. Яко услыша убогия Господь и окованныя Своя не уничижи. Да восхвалят Его небеса и земля, море и вся живущая в нем. Яко Бог спасет Сиона, и созиждутся гради Иудейстии, и вселятся тамо, и наследят и, и семя рабов Твоих удержит и, и любящии имя Твое вселятся в нем.
Молитва перед иконой Пресвятой Богородицы Леньковской, именуемой "Спасительница утопающих"
Заступница усердная, Мати Господа Вышняго! Ты еси всем христианом помощь и заступление, паче же в бедах сущим. Призри ныне с высоты святыя Твоея и на ны, с верою покланяющияся Пречистому образу Твоему, и яви, молим Тя, скорую помощь Твою по морю плавающым и от ветров бурных тяжкия скорби терпящим. Подвигни и вся православныя христианы на спасение в водах утопающих, и воздаждь подвизающимся о сем богатыя милости и щедроты Твоя. Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и напаствуемых. Ты по Бозе наша Надежда и Заступница, и на Тя уповающе, сами себе, и друг друга, и весь живот наш Тебе предаем во веки веков. Аминь.
Молитва перед полетом
Господи Иисусе Христе, Боже наш, стихиям повелеваяй и вся горстию содержай, Егоже бездны трепещут и Емуже звезды присутствуют. Вся тварь Тебе служит, вся послушают, вся Тебе повинуются. Вся можеши: сего ради вся милуеши, Преблагий Господи. Тако и ныне убо, Владыко, рабов Твоих сих (имена) моления теплыя приемля, благослови путь их и воздушное шествие, запрещая бурям же и ветром противным, и лодию воздушную целу и невредиму соблюдая. Спасительное и небурное по воздуху превождение им даруя и благое намерение совершившим им во здравии и в мире возвратитися изволь. Ты бо еси Спас и Избавитель и всех благих небесных и земных Податель и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.
Молитва водителя
Боже Всеблагий и Всемилостивый, всех охраняяй Своею милостию и человеколюбием, смиренно молю Тя, предстательством Богородицы и всех святых, сохрани от внезапной смерти и всякой напасти мене, грешнаго, и вверенных мне человек и помози невредимых доставлять каждаго по его потребе. Боже милостивый! Избави мене от злаго духа лихачества, нечистой силы пиянства, вызывающих несчастия и внезапную смерть без покаяния. Спаси мене, Господи, с чистой совестию дожить до глубокой старости без бремени убитых и искалеченных по моему нерадению людей, и да прославится имя Твое святое, ныне и присно, и во веки веков. Аминь.
Молитва о прекращении пожара
Тропарь Божией Матери пред иконою Ее "Неопалимая Купина", глас 4-й
Во огни купины неопалимыя, древле Моисеем виденныя, тайну воплощения Своего от Неискусобрачныя Девы Марии прообразовавый, Той и ныне, яко чудес Творец и всея твари Создатель, икону Ея святую чудесы многими прослави, даровав ю верным во исцеление от недугов и в защищение от огненнаго запаления. Сего ради вопием Преблагословенней: Надеждо христиан, от лютых бед, огня и грома избави на Тя уповающия, и спаси души наша, яко Милосерда.
----------------------------------------------------------------------
Молитва вседневная воинская
Боже великий и многомилостивый! Не имам иныя помощи, не имам инаго утешения, разве Тебе, Владыко. Ко Твоему величеству припадаю, безмерную Твою благость смиренно моляще: призри на мя, недостойнаго раба Твоего, в труде ратнем (воинском) подвизающагося, и низпошли руку Твою, во еже помощи ми. Се должен семь и хощу достойно ходити честнаго звания моего, в нужде же и обстоянии Отечества моего стояти за правду его до последняго моего издыхания, якоже обещахся Ти в день клятвы моея. Обаче без воли Твоея ничтоже есть человек. Сего ради к Тебе, Содетелю, простираю руце мои и Тебе прошу: просвети ум мой, во еже скоро прияти и спешно навыкнути преподаваемому нам учению ратному, сердце мое исполни терпения и любве к милующим мя и к досаждающим ми, хотение мое направи к верной службе Отечеству моему и законам его, якоже христолюбивому воину благопристойно есть и надлежит. Отжени от мене помышления лукавыя, отврати всяку болезнь и печаль и воздыхание. Даждь ми, Господи, твердое стояние в Святой Православной Вере отцев моих и на всяк день память молитвеннаго благословения матере моея. Отечество наше, Господи, в мире и единомыслии сохрани, Церкви Твоей Святой подаждь благостояние и в Вере преспеяние. Правительству и военачальником нашим даруй мудрость и силу, вложи в сердца их благая о людех Твоих, доблестное воинство наше покажи врагам победительно, слабым заступление и всем людем Твоим подаждь яже ко временной и вечной жизни потребная. Родители моя, братия, сестры, жену, чада и вся ближняя рода моего во здравии и долгоденствии соблюди. Избави я от всякия скорби и нужды, даруй им изобилие плодов земных и во всех благих начинаниих Помощник им буди. К нимже и мене во время свое благополучна возврати, да радующеся милостем Твоим, всегда благословим Всесвятое имя Твое, Отца и Сына и Святаго Духа.
Оценили 16 человек
37 кармы